வேட்கை வேகம் எடுக்கிறது

எல்லாம்
முடிந்துவிட்டது என்று
அவன் நினைக்கும்போதுதான்
எல்லாம் ஆரம்பிக்கிறது..

சின்னதாகப் பேசுகிறான்
பெரிதாக பொருள்படுகிறது..
பெரிதாக பேசுகிறான்
சிறிதாகவே பொருள்படுகிறது..

இழப்பதற்கு
ஒன்றுமில்லை என்று
அவன் நினைக்கும்போதுதான்
நானிருக்கிறேன் என்று
அவ்வப்போது
ஞாபகப் படுத்துகிறது
அவன் உயிர்.

போராடினால் உண்டு
பொற்காலம் என்பதை
வேத வாக்காக
எடுத்துக் கொண்டவன்
அவ் வாக்கியத்தின் அர்த்தம்
அறியாமலேயே போய்விடுகிறான்..

ஓடிக் கொண்டேயிரு
இலக்கை அடையலாம்
யாரோ சொல்ல
ஓட ஆரம்பித்தவன்
ஓடிக் கொண்டேயிருக்கிறான்..
இலக்கை மறந்துவிட்டான்..

வாழ்ந்து முடிந்தவர்கள்
வரிசையாய்
சென்றுகொண்டே இருக்கிறார்கள்
இவன் எப்படி வாழப்போகிறான் என
சில பேரை பரிதாபமாக பார்த்தபடி..

ஆனால் ஒன்று
பலமுறை
செத்தவனுக்கு
ஒரே ஒரு முறையாவது
வாழ வேண்டும் என்ற
வேட்கை
வேகமெடுக்கவே செய்கிறது..