சென்னை பதிவர் சந்திப்பு ஆலோசனை கூட்டத்தில் நடந்தது என்ன?

           வணக்கம் பதிவர்களே!சென்னையில் நாமெல்லாம் ஒன்று கூடி சந்தித்து பேசி மகிழ இன்னும் இரண்டு வாரங்களே இருக்கிறது.ஊர்,இனம்,மதம்,புதிய பதிவர்,பிரபல பதிவர் போன்ற  பிரிவினையைத்தாண்டி நாமெல்லாம் தமிழ் வலைப்பதிவர் என்ற முறையில் சென்னையில் சந்தித்து பேசி மகிழலாம் என்ற நோக்கோடுதான் சென்னையில் பதிவர் சந்திப்பிற்கு ஏற்பாடு செய்யப்பட்டது.

         ஆரம்பத்தில் ஆகஸ்டு மாதம் 19 ம் தேதி பதிவர் சந்திப்பு நடத்தலாமென முடிவு செய்யப்பட்டிருந்து .அந்நாளில் ரம்ஜான் பண்டிகை வருவதால் இசுலாமியத் தோழமைகளும் கலந்து கொள்ளும் வண்ணம் ஆகஸ்டு 26 ம் தேதிக்கு தள்ளி வைக்கப்பட்டது.

         முதலில் நாம் சந்திக்கும் இடமாக மாணவர் மன்றத்தை தேர்வு செய்திருந்தோம்.ஆனால் கிட்டத்தட்ட 100 க்கும் மேற்பட்ட பதிவர்கள் கலந்து கொள்ள இருப்பதால் பதிவர்களின் வசதி குறித்து மாற்று இடம் குறித்த தேடல் அவசியம் ஆனது.

         இதற்கு முன்னதாக 29.7.2012 ஞாயிறு சென்னை கே.கே.நகரிலுள்ள டிஸ்கவரி புத்தக நிலையத்தில் முதற்கட்ட ஆலோசனை நடத்தினோம்.அதில் தேதி மாற்றத்தை குறித்தும் மாற்றிடம் தேடுவது குறித்தும் சந்திப்பை பெரிய அளவில் நடத்துவது குறித்தும் ஆலோசனை எடுக்கப்பட்டது.

         இரண்டாவது ஆலோசனைக் கூட்டம் 5.8.2012 ஞாயிறு டிஸ்கவரி புத்தக நிலையத்திலேயே நடந்தது.அதில் ஒன்று கூடி சந்திப்பு நடக்ககூடிய இடத்தை முடிவு செய்தோம்.

         பொருளாதார பிரச்சனையை எப்படி கையாளுவது என்பதை குறித்தும் நல்ல முடிவுக்கு வந்தோம்.சென்னை பதிவர் அனைவரும் பங்கிட்டு கொள்வதாக உறுதி எடுத்துக் கொண்டோம்.

         இதற்கிடையில் வெளியூர் பதிவர்கள் தங்கும் இடம் குறித்தும் ஆலோசிக்கப்பட்டது.

         மூத்த பதிவர்களுக்கான பாராட்டுவிழா குறித்து பேசப்பட்டது.யாரெல்லாம் மூத்த பதிவர் என வரையறுக்கப்பட்டது.முடிவில் 60 வயதை தாண்டி பதிவெழுதிக் கொண்டிருக்கும் பதிவர்களே மூத்த பதிவர்கள் என முடிவு செய்யப்பட்டது.

        விழாவிற்கு வருகைதரும்படி மூத்த பதிவர்களையும் கேட்டுக் கொள்கிறோம்.

        வெளியூரில் இருந்து வருகை தரும் தோழர்கள் எங்களுக்கு முன்கூட்டியே சென்னை வரும் நேரத்தை குறிப்பிட்டு சொன்னால் தங்குவதற்கு இடம் தயார் செய்யப்படும்
 
       வெளியூர் தோழர்களுக்கு உபயோகப்படும் வகையில் சனி இரவு ஆறு மணியிலிருந்து ஞாயிறு காலை 9 மணிவரைக்கும் அறை ஏற்பாடு செய்யப்படும்.

        ஒரு நாள் முழுவதும் விழா நடக்க இருப்பதால் மதிய உணவு வழங்கவும் மற்ற வசதிகள் செய்யவும் ஏற்பாடாகி வருகிறது.எனவே சந்திப்பிற்கு வரும் தோழர்கள் முன்கூட்டியே தெரிவிக்கும்படி கேட்டுக்கொள்கிறோம்.

        விழாவிற்கான அழைப்பிதழும் நிகழ்ச்சி நிரலும் வரும் இரண்டொரு நாளில் வெளியிடப்படும் என்பதை மகிழ்வோடு தெரிவித்துக் கொள்கிறோம்..

         நடைபெற்ற ஆலோசனைக்கூட்டத்தில் நான், மெட்ராஸ் பவன் சிவக்குமார், வீடு திரும்பல் மோகன்குமார், மின்னல் வரிகள் பாலகணேஷ், கவிதை வீதி சௌந்தர், பட்டிக்காட்டான் பட்டிணத்தில் ஜெயக்குமார், கரைசேரா அலை அரசன், தென்றல் சசிகலா, டி.என்.முரளிதரன், புலவர் இராமானுசம், கேபிள் சங்கர், ஆரூர் மூனா செந்தில், பிலாசபி பிரபாகரன், அஞ்சாசிங்கம் செல்வின், டீக்கடை சிராஜுதீன் போன்றோர் கலந்து கொண்டோம்.
உடல் நிலை சரியில்லாததால் சென்னைபித்தன் ஐயா கலந்து கொள்ளவில்லை.