சரவணன் மீனாட்சி -குடும்பத்தோடு பார்க்க சங்கடமில்லையா?

            வீட்டு வாசலில் கயிற்றுக் கட்டிலை போட்டு படுத்தபடி காற்று வாங்கிக் கொண்டிருந்தான் சின்ராசு.

"மாமா.. மாமோவ்"

               அழைத்துக்கொண்டே அவன் அருகில் வந்தாள் அம்மணி.

ஏ..அம்மணி டி.வி பாக்குலயா அதுக்குள்ள வந்துட்டே..மணி என்னாச்சு சரவணன் மீனாட்சி முடிஞ்சிடுச்சா?

"அது இன்னும் முடியலீங் மாமா..ஓடிட்டுதான் இருக்குது"

              சொன்னவளை ஆச்சர்யமாக பார்த்த சின்ராசு,

"என்ன அம்மணி.. ஆஹா பிரமாதம் பிரமாதம்ன்னு சொல்லி, சரவணனும் அவுங்க அப்பாவும் பண்ற லூட்டிய ரசிச்சு பாப்பியே என்னாச்சு"

"ஆமாங் மாமா..எந்த டிவியில சீரியல் பாத்தாலும் ஒரே அழுகாச்சின்னு விஜய் டிவி பக்கம் வந்தேன்.அங்கப் பாத்தா இந்த சரவணன் மீனாட்சி ஓடிட்டு இருந்துச்சி.எல்லா டிவி யில வர்ற சீரியல் மாதிரி இல்லாம..இது புதுசாவும் வித்தியாசமாவும் சினிமா மாதிரி இருந்துச்சு.நல்லா ஜாலியா சரவணனும் அவுங்க அப்பாவும் பண்ற கூத்தும்,சரவணனும் மீனாட்சியும் பண்ற காதலும் நல்லாத்தான் ரசிக்கிற மாதிரி இருந்துச்சு"

"அது சரி அம்மணி ..அதுதான் எனக்கே தெரியுமே..இப்ப ஏன் சீரியல் பாக்காம எந்திரிச்சு வந்தே"

"அதைத்தான் மாமா சொல்ல வரேன்..சரி ரெண்டு பேருக்கும் கண்ணாலம் ஆயிடுச்சுன்னா கதை முடிஞ்சிடும்.இந்த கண்ணாலம் எப்படி முடியும்ன்னு பாக்கலாம்ன்னு பாத்தா கடைசியில வேணுமின்னே சரவணனை அடிச்சு வெரட்டி நடுரோட்டுக்கு தொரத்தி விட்டுட்டாங்க..மீனாட்சி மண்டபத்துல மணவறையில உக்காந்திருக்கா..அப்புறம் என்னடான்னா சினிமாவுல காட்டுற மாதிரி கட் பண்ணினா கடைசியா சரவணைனை தேடி மீனாட்சி கார் எடுத்துட்டு வர்றா..'இன்னிசை பாடிவரும் இளங்காத்துக்கு உருவமில்லைன்னு சரவணன் பாட்டு மட்டும்தான் பாடலை.' சரி அவுங்களும் கதைய முடிக்கணுமில்லன்னு பாத்தா அவுங்க ரெண்டு பேருக்கும் கண்ணாலம் ஆகியும் கதையை முடிக்காம அவுங்க அக்காளுக்கும் இவங்க அண்ணனுக்கும் லிங்க கொடுத்து போலீஸ்காரனுக்கும் அந்த கருத்த புள்ளைக்கும் லிங்க கொடுத்து மத்த டிவிக்காரங்க மாதிரி மெகா சீரியலா இழுக்கலாமுன்னு ஆசைப் பட்டு சம்பந்தமில்லாம சவ்வு மிட்டாய் மாதிரி சீரியல இழுக்குறாங்க மாமா"

"அம்மணி.."

"இருங்க மாமா அதைத்தானே சொல்லிட்டு இருக்கேன்..சரி என்னமோ போன்னு நானும் இப்பவரைக்கும் பாத்துட்டுதான் இருந்தேன்.காமெடி கலாட்டான்னு இழுத்துக்கிட்டே போகுமுன்னு நெனச்சா..அவுங்க ரெண்டு பேருக்கும் முதலிரவு நடத்தற விசயத்தையே ஒரு மாசமா காட்டிட்டு இருக்கிறாங்க.எல்லோரும் உக்காந்து குடும்பத்தோட பாக்குற சீரியல் இதுவாத்தான் இருந்துச்சு..இந்த பத்து நாளா யாரும் குடும்பத்தோட உக்காந்து இந்த சீரியல பாத்திருக்க மாட்டாங்கன்னு நெனைக்கிறேன். பாக்கவும் முடியாது"

"ஏன் அம்மணி அப்படி என்ன ஆச்சு "

"என்னாச்சா..ஏனுங்மாமா காது காதும் வச்ச மாதிரி நடக்குற முதலிரவை இவுங்க ஏலம் போட்டு விக்கிறாங்க.சினிமாவுல கூட முதலிரவு விசயத்தை பட்டுன்னு சொல்லி படக்குன்னு கட் பண்ணிப்போடுறாங்க..ஆனா இவுங்க அதை மட்டுமே வச்சு ஒரு மாசத்தை ஓட்டுறாங்க.அப்பா அம்மாகிட்டயே மகன் முதலிரவுக்கு ஏற்பாடு பண்ணுங்கன்னு சொல்றான்.அப்பா அம்மா இருக்கும்போதே மகன் பொண்டாட்டிக்கிட்ட சில்மிஷத்தைக் காட்டுறான்.கேட்டா நகைச்சுவை காட்சிங்கிறாங்க.சர்வசாதாரணமா அம்மா மகன்கிட்ட உனக்கு இன்னைக்கு டீ தரமாட்டங்க போலங்கிற மாதிரி இன்னைக்கு முதலிரவு உனக்கு நடக்காது போலன்னு ரொம்ப அசால்ட்டா  சொல்றாங்க..அப்பனும் மகனும் முதலிரவை பத்தி டிஸ்கஸ் பண்ணிக்கிறாங்க.எனக்கு முதலிரவு நடக்காததுக்கு காரணமே நீதான்னு அம்மாகிட்ட மகன் சண்டைக்கு போறான்.சரவணனும் மீனாட்சியும் பேசிக்கிறது சிணுங்கிறது எல்லாம் முதலிரவை பத்திதான்.இது போதாதுன்னு மீனாட்சியோட தாய் மாமனுங்க வந்து, எந்த வெக்கமும் படாம மீனாட்சிக்கிட்ட முதலிரவ நாளைக்கு வச்சுக்குங்கன்னு சொல்றாங்க..சரவணன்கிட்ட வந்து மீனாட்சியோட மாமா, மாப்பிளை உங்களுக்கு சிட்டுக்குருவி லேகியம் இருக்குன்னு சொல்றாங்க..என்னங் மாமா இது. காதும..குசுகுசுன்னு பேசி நடத்துற விசேசத்தை இப்படி கூப்பாடு போட்டா செய்வாங்க..  இந்த சீரியல மாமனார், மருமக, அண்ணன், தங்கச்சின்னு எல்லாம் குடும்பத்தோடதான பாத்துட்டு இருக்காங்க..இப்படி வசனத்துக்கு வசனம் முதலிரவு முதலிரவுன்னு அவுங்க படுற வெட்கங்களையும் அவுங்க பண்ற சில்மிஷங்களையும் அதுக்கு தயாராகிற காட்சிகளையும் எப்படி மாமா ஒண்ணா உக்காந்து பாப்பாங்க.நல்ல சீரியல்லுன்னு நம்பிதான் எல்லாம் பாக்குறாங்க.எல்லாருடைய வீட்டுலயும் வயசுப்பொண்ணுங்க இருக்கு..எல்லாரும் இந்த சீரியல பாக்குறாங்க.. முதலிரவை சுத்தியே சீரியல் போனா பெத்தவங்களுக்கு புள்ளைங்களுக்கும் தர்ம சங்கடத்தை ஏற்படுத்தாதா.

          என்ன கொடுமைன்னா நேத்தைக்கு சீன்ல எப்ப நமக்கு முதலிரவுன்னு உங்க மாமாக்கிட்ட கேளுன்னு சரவணன் மீனாட்சிக்கிட்ட சொல்ற மாதிரி சீனு. அதுக்கு அவ வெட்கப்பட அவுங்க மாமா கொஞ்சங்கூட கூச்சப்படாம நரி மாதிரி சிரிச்சுட்டு நாளைக்கு உங்களுக்கு முதலிரவுன்னு பல்லைக்காட்டுறார்.பக்கத்துல சரவணன் அம்மா குயிலியும் இருக்காங்க..எல்லா குடும்பத்துலயும் இப்படிதான் முதலிரவைப் பத்தி பேசிக்குவாங்களா?இதை எப்படி குடும்பத்தோட பாக்க முடியும்..பத்து வயசு பொண்ணுங்களையும் பசங்களையும் முதலிரவுன்னா என்னாங்கிற தேடலுக்கு ஆளாக்கிவிட்டுடுவாங்களோன்னு தோணுது.என்னாலயே அந்த மாதிரி வசனத்தையும் சரவணன் மீனாட்சியை சுத்தி சுத்தி வர்ற காட்சியையும் மீனாட்சி வெட்கப்படுறதையும்  சகிச்சுக்க முடியலை மாமா..நம்ம பையனுக்கு பத்து வயசுதான் ஆகுது 'முதலிரவுன்னா என்னம்மா'ன்னு எங்கிட்ட கேட்கிறான்.அதனாலதான் டிவிய ஆப் பண்ணிப்போட்டு வந்துட்டேன்"

"எல்லாரும் உன்ன மாதிரிதான் யோசிப்பாங்கன்னு நெனைக்கிறியா அம்மணி"

"மாமா இது என்னோட தனிப்பட்ட கருத்துதான்.மத்தவங்க அதை ரசிச்சு கூட பாக்கலாம்"

"சரி அம்மணி உன் ஆதங்கம் புரியுது..நீ சொல்லியா சீனை மாத்திடப்போறாங்க"

"அவுங்க மாத்தினாலும் சரி மாத்தலைன்னாலும் சரி இனி அந்த சீரியலை நான் பாக்கறதா இல்லை.அப்படி பாக்கறதா இருந்தாலும் சரவணனுக்கும் மீனாட்சிக்கும் குழந்தை பிறந்ததுக்கு அப்புறந்தான் பாப்பேன்'

"அதுவரைக்கும் ஓடுங்கிறயா"

"அதான் மத்த டிவி சீரியலை பாத்து இவங்களும் ஒண்ணுமில்லாததையே ஒரு வாரம் காட்டுறாங்களே..இதை மெகா சீரியலாக்குறேன் பேர்வழின்னு இந்த சீரியலை சின்னாபின்னமா ஆக்காம விடமாட்டாங்குன்னு நினைக்கிறேன்."

           என்று சொன்ன அம்மணி தலையில் அடித்துக்கொள்ள,

"அம்மா சூப்பர் சிங்கர் போட்டுட்டான்"

           என்று அம்மணியின் மகன் முருகேசன் வீட்டிற்குள்ளிருந்தபடியே சத்தமிட ,

"வாங்க மாமா உங்களுக்கு புடிச்ச சூப்பர் சிங்கரு போட்டுட்டான் அதையாவது பாக்கலாம்"

          சொல்லிவிட்டு அம்மணி நகர அவளை பின் தொடர்ந்தான் சின்ராசு.