சென்னை பதிவர் சந்திப்பு - தேதி மாற்றம்

                           சென்னை பதிவர் சந்திப்பு - முக்கிய அறிவிப்பு

                                                          தேதி மாற்றம்

          வணக்கம் தோழமைகளே..ஏற்கனவே முடிவு செய்தபடி சென்னை பதிவர் சந்திப்பு குறித்த ஆலோசனை கூட்டம் 29.7.2012 நேற்று மாலை டிஸ்கவரி புத்தக நிலையத்தில் நடைபெற்றது.

       இந்த முதற்கட்ட ஆலோசனை கூட்டத்தில் நான்,கவிதை வீதி சௌந்தர்,மின்னல் வரிகள் கணேஷ்,மெட்ராஸ் பவன் சிவக்குமார்,வீடு திரும்பல் மோகன்,பட்டிக்காட்டான் பட்டினத்தில் ஜெயக்குமார்,கரைசேரா அலை அரசன்,தென்றல் சசிகலா,டி.என்.முரளிதரன் உள்ளிட்டோர் கலந்து கொண்டு ஆலோசித்தோம்.நிகழ்வை எப்படி சிறப்பாக செயல்படுத்துவது குறித்து கலந்தாலோசித்து சில முடிவுகளை எடுத்தோம்.

         இந்த சந்திப்பில் எடுக்கப்பட்ட முக்கிய முடிவுகளையும் இறுதி செய்யப்பட்ட நிகழ்ச்சி நிரலையும்  வீடு திரும்பல் மோகன்குமார் ஓரிரு நாட்களில் அவருடைய வலைப்பூவில் பதிவாக இடுவார்.
    

                                       தேதி மாற்றம்

           19.8.2012 ஞாயிற்றுக்கிழமை பதிவர் சந்திப்பை நிகழ்த்தலாம் என திட்ட்மிட்டு அறிவித்து அதற்கான ஏற்பாடுகளை செய்து வருகிறோம். சந்திப்பிற்கான நாளை முடிவு செய்யும் போது அனைத்து பதிவர்களும் கலந்து கொள்ள ஏதுவாக இருக்கும் வண்ணம் விடுமுறை நாளான ஞாயிற்றுக் கிழமையை தேர்ந்தெடுத்தோம்.


           ஆனால் அந்த நாளில் இசுலாமிய திருவிழாவான ரம்ஜான் வருவதை அறியாமற்போய்விட்டோம்.

         
           இந்நாளில் சந்திப்பை வைத்தால் இசுலாமிய தோழர்களால் இந்த சந்திப்பில் பங்கெடுக்க முடியாத நிலை ஏற்பட்டது.இசுலாமிய தோழர்கள் தொடர்பு கொண்டு தாங்கள் கலந்து கொள்ள முடியாத நிலை விளக்கினர்.எனவே இது குறித்து நேற்று விவாதம் நடந்த போது அவர்களும் இதில் கலந்து கொள்ளும் வண்ணம் 26.08.2012 ஞாயிற்றுக்கிழமை சந்திப்பை வைத்துக் கொள்ளலாம் என முடிவு எடுக்கப்பட்டது.ஒருநாள் முழுவதும் இந்த சந்திப்பு நடபெறும்.முழுக்க முழுக்க இது பதிவர்களுக்கான நாளாக இருக்கும் வண்ணமே ஏற்பாடுகள் நடைபெறுகிறது.
          
           19.8.2012 அன்று பயணச்சீட்டை முன்பதிவு செய்திருந்த தோழமைகளோடு இது குறித்து சொன்னபோது அவர்களும் மாற்றுக்கருத்து எதுவும் தெரிவிக்காமல் இது சரியான முடிவுதான் எனவே அன்றைய தின முன்பதிவை ரத்து செய்துவிட்டு 26.8.2012 அன்றைய தேதியில் முன் பதிவு செய்து கொள்கிறோம் என சொல்லியிருக்கிறார்கள்.அவர்களின் புரிதலுக்கும்,ஒத்துழைப்பிற்கும் நன்றி.