கருகிய ரூபாய் நோட்டுகள்

எத்தனை

ரூபாய் நோட்டுகள்

எரிந்துபோய்

தெருவில்

சாம்பலாகி சவமாய்

கிடக்கிறதெனத் தெரியவில்லை..

ஒரு கணக்காளரை

நியமித்திருந்தால் ஒருவேளை

கணக்கிட்டு சொல்லியிருப்பார்..

அதுவும் இப்போது இயலாது..

இலக்கங்கள் எல்லாம்

புகையைக் கக்கியபடி

கருகிப்போய்

உருகிப்போய் கிடக்கின்றனவே...

பட்டாசை வெடித்து

ரசிக்கும் குழந்தைகளின்

மகிழ்ச்சிக்குப் பின்னால்

கந்தக பூமியில் வாழும்

பல குழந்தைகளின்

வறுமையும்

உழைப்பும் இருக்கிறது
என்று நினக்கும்போது
எங்கோ வெடிக்கும்
பட்டாசின் சத்தம்
நெஞ்சறையைத் தாக்குகிறது..

அவர்களின் உழைப்பு 

வெடித்து சிதற சிதறத்தான்

அவர்களின் வறுமை

அகல ஆரம்பிக்கிறது

என நினைக்கும்போது

பட்டாசாய் மனம்

வெடிக்கத்தான் செய்கிறது.

இந்த தீபாவளியும்

வழக்கம்போல
செல்வந்த குழந்தைகளை
சந்தோஷப்படுத்திவிட்டும்
குடிசை வாழ்
குழந்தைகளை
குதூகலப்படுத்தாமலுமே
சென்றிருக்கிறது..

செல்வந்தனுக்கு

செலவென்பது

எறும்பு கடித்த மாதிரி..

குடிசைவாசிக்கு-அது

தேள் கடித்த மாதிரி..

குடிசைவாசிகளின் தீபாவளி

பட்டாசு வெடிப்பது அல்ல

யாரோ வெடிக்கும்

சத்தத்தை கேட்பதுதான்..

பணத்தை செலவிட்டு

பட்டாசைப் பற்றவைத்து-அது

வானத்தில்

வண்ணக்கோலமிட்டதைக் கண்டு

செல்வந்தன்

வீட்டுப் பிள்ளை பெற்ற

சந்தோசத்தை விட-அதை

எங்கோ நின்று

கண் கொட்டாமல் பார்த்த

குடிசைவாசி குழந்தைகளின்

குதூகலம் தான்

உண்மையான

தீபாவளிக் கொண்டாட்டமாய்ப் பட்டது.

                                *****