ஷங்கர் பட நாயகிகள் ஜொலிக்காமல் போகிறார்களா?

                                                                                                                            / கோடம்பாக்கம்/
                                                                                                                                வெள்ளித்திரை

       தமிழ் திரையுலகின் பிரம்மாண்ட இயக்குனர், அதிக சம்பளம் வாங்கும்  இயக்குனர்,பெரிய பட்ஜெட் இயக்குனர் என்ற பெருமையைப் பெற்றவர் இயக்குனர் ஷங்கர் அவர்கள்.இயக்குனர் எஸ்.ஏ.சந்திரசேகரன் அவர்களிடத்தில் பெரும்பான்மையான படங்களில் உதவி இயக்குனராக பணியாற்றி வசந்தகாலப்பறவை, சூரியன், ஐ லவ் இந்தியா போன்ற படங்களில் இயக்குனர் பவித்ரன் அவர்களிடத்தில் இணை இயக்குனராக பணியாற்றி 1993 ஆம் ஆண்டு குஞ்சுமோன் தயாரித்த 'ஜென்டில்மேன்' படத்தின் மூலமாக இயக்குனராக அறிமுகமாகி தமிழ்சினிமாவை திரும்பிப் பார்க்க வைத்தவர்.அவர் இயக்கிய படங்களில் 'பாய்ஸ்' தவிர அனைத்தும் வெற்றிப்படங்களே..ஒவ்வொரு படத்திலும் ஏதேனும் புதுமையை புகுத்தி தன் திறமையை இந்திய அளவிற்கு வெளிச்சம் போட்டுக் காட்டியவர்.

        தமிழ் திரையுலகின் முக்கிய இயக்குனராக இருக்கும் இவரை அவரது படங்கள் இந்திய திரையுலகின் கவனிக்கத்தக்க இயக்குனராக கொண்டு சேர்த்தது.இவரது படம் ரிலீஸ் என்றால் முதல் நாள் தியேட்டர் கூட்டத்தில் வழியும் என்பது மறுக்க முடியாத ஒன்று.

   ரஜினி படம்,கமல் படம்,அஜீத் படம்,விஜய் படம் என்பதையும் தாண்டி ஷங்கர் படம் என்ற இமேஜை பெரியளவில் ஏற்படுத்தியவர்.புது முகத்தை வைத்து ஷங்கர் இயக்கினால் கூட பெரிய ஓப்பனிங் இவரது படத்திற்கு உண்டு என்பதற்கு இவர் இயக்கிய 'பாய்ஸ்' உதாரணம். ஆனால் படம் தோல்வியை சந்தித்தது.காரணம், அதே போல ஒரு கதையைக் கொண்டு கஸ்தூரிராஜா இயக்கிய 'துள்ளுவதோ இளமை' படம் பெரிய வெற்றி பெற்றதுதான்.ஷங்கர் படத்தில் நடிக்க எத்தனையோ கதாநாயகிகள் இன்றைக்கு வரிசையில் நிற்கிறார்கள்.அவர் படத்தில் நடித்தால் தமிழின் முக்கிய கதாநாயகி ஆகிவிடலாம் என்பதுதான் காரணம்.ஷங்கர் அவர்கள் இதுவரை தமிழில் இயக்கி படங்கள் 10.அதில் நடித்த கதாநாயகிகள் எந்தளவிற்கு தமிழில் புகழ்பெற்றார்கள் என பார்ப்போம்..

     ஷங்கரின் முதல் படம் 'ஜென்டிமேன்' இதில் நாயகியாக நடித்தவர் மதுபாலா. இப்படம் பெரிய வெற்றியைப் பெற்றது.ஆனாலும் மதுபாலாவுக்கான வெற்றிக்கதவு கதவு பெரிதாய் திறக்கப்படவில்லை.

    ஷங்கரின் இரண்டாவது படம் 'காதலன்' அது பிரபு தேவாவுக்கும் இரண்டாவது படம் அதில் அறிமுகமான நாயகி நக்மா.படம் வெற்றி பெற்றது.அடுத்து ரஜின்காந்தோடு 'பாட்ஷா' படத்தில் ஜோடி சேர்ந்தார் நக்மா.அதன்பிறகு நடித்த ஓரிரண்டு படங்கள் தோல்வியைத் தழுவ அவரும் காணாமல் போனார்.

    ஷங்கரின் மூன்றாவது படம் 'இந்தியன்'. மும்பையிலிருந்து மனீஷா கொய்ராலாவை அழைத்து வந்து தனது 'பம்பாய்' படத்தில் அறிமுகப்படுத்தினார் மணிரத்னம்.படம் மிகப்பெரிய வெற்றி.தொடர்ந்து ஷங்கர் தனது இந்தியன் படத்தில் நாயகனாக்கினார்.இந்தியனும் மிகப்பெரிய வெற்றி பெற்றது.தமிழ் சினிமாவை ஆட்டிப்படைப்பார் என்று எதிர்பார்த்த மனீஷா கொய்ராலா மணிரத்னத்தின் 'உயிரே' தோல்விப்படத்தோடு மும்பை சென்று விட்டார்.

            ஷங்கரின் நான்காவது படம் 'ஜீன்ஸ்' இப்படத்திற்கு மணிரத்னம் 'இருவர்' படம் மூலமாக தமிழ் சினிமாவில் அறிமுகப்படுத்திய முன்னாள் உலக அழகியான ஐஸ்வர்யா ராயை நாயகியாக்கினார்.படம் மிகப்பெரிய வெற்றி.ஆனால் ஐஸ்வர்யா ராயை அதற்குப்பிறகு தமிழில் காணவில்லை.இடையில் 'கண்டு கொண்டேன் கண்டு கொண்டேன்" படம் நடித்தார்.சில வருடங்களுக்குப் பிறகு ராவணன் எந்திரன் போன்ற படங்களில் நடித்தார்.இடையில் என்னானார் எனத் தெரியவில்லை.வேறு இயக்குனர்கள் அவரை அழைக்கவில்லையா அல்லது வேறு இயக்குனர்கள் படத்தில் நடிக்க இவர் விரும்பவில்லையா எனத் தெரியவில்லை.ஆனால் தமிழில் அவர் நடித்த நான்கைந்து  படங்களில்  பெரிய வெற்றி பெற்ற படம் என்றால் ஷங்கர் இயக்கிய 'ஜீன்ஸ்' தான்.

    ஷங்கரின் ஐந்தாவது படம் 'முதல்வன்' இந்தப்படத்தில் மீண்டும் மனீஷாவை நாயகியாக்கினார்.கொஞ்சம் வயதானது போல தோற்றத்தை கொண்டிருந்தார் மனீஷா.படம் வெற்றியடைந்தாலும் மனீஷாவின் மார்க்கெட் தமிழில் பெரிதாக இல்லாமல் போனது.

   ஷங்கரின் ஆறாவது படம் 'பாய்ஸ்'.ஹரிணி என்ற பெண்ணை நாயகியாக்கினார். சொல்லப்போனால் முழுக்க புதுமுகங்களை வைத்தே இயக்கினார்.படப்பிடிப்பின் போதே படம் மிகப்பெரிய எதிர்பார்ப்பை ஏற்படுத்தியது.அதே சமயம் கஸ்தூரி ராஜா தனது மகன் தனுஷை நாயகனாக்கி 'துள்ளுவதோ இளமை' படம் எடுத்து வெற்றி பெற,அதன் பிறகு வந்த 'பாய்ஸ்' தோல்வியைத் தழுவியது.ஹரிணி காணாமற்போனார்.பின்னர் அவர் ஜெனிலியா என்று பெயரை மாற்றிக்கொண்டு சில படங்கள் நடித்தார்.ஆனாலும் முன்னுக்கு வர முடியவில்லை.

            ஷங்கரின் ஏழாவது படம் அந்நியன்.பெரிதாக எதிர்பார்க்கப்பட்ட படத்தில் 'ஜெயம்' படம் மூலம் அறிமுகமான சதாவை நாயகியாக்கினார்.அந்த நாயகி இனி தமிழில் கொடிகட்டிப் பறப்பார் எனப் பார்த்தால் அதற்குப் பிறகு சுத்தமாக மார்க்கெட்டை இழந்துவிட்டார்.


           ஷங்கரின் எட்டாவது படம் ரஜினிகாந்த நடித்த சிவாஜி .மிகப்பெரிய எதிர்பார்ப்புக்கு மத்தியில் ரஜினிகாந்திற்கு ஜோடியானார் ஸ்ரேயா.படம் மிகப்பெரிய வசூலைக்குவித்தும் ஸ்ரேயாவை தமிழ் சினிமா கண்டுகொள்ளவேயில்லை.விஜயுடன் ஜோடியாக நடித்த கையோடு வடிவேலோடு ஒரு பாட்டுக்கு ஆடப்போனவரை இப்போது வரை காணவில்லை.

    ஷங்கரின்  ஒன்பதாவது படம் 'எந்திரன்.இப்படத்தில் மீண்டும் ஐஸ்வர்யாவை ஜோடியாக வைத்து இயக்கினார்.ரஜினிகாந்தோடு ஐஸ்வர்யாவை ஜோடியாக்கவேண்டும் என்ற ரசிகர்களின் எதிர்பார்ப்பை பூர்த்தி செய்வதற்காகவே நாயகியின் தேர்வு இருந்திருக்கிறது என்றே சொல்லலாம்.

             ஷங்கரின் பத்தாவது படம் ஹிந்தியில் வெளியான 3 இடியட்ஸ் படத்தை தழுவி எடுக்கப்பட்ட  நண்பன்.விஜய் நாயகனாக நடிக்க அவருக்கு ஜோடியாக 'கேடி' படத்தில் அறிமுகமான இலியானாவை ஜோடியாக்கினார் ஷங்கர்.ஆந்திராவில் பிசியாக இருந்த இலியானா இப்படத்தின் மூலம் தமிழ் சினிமாவை ஆட்டிப்படைப்பார் என்ற கோடம்பாக்க ஆரூடம் பொய்த்துப்போனது.அதற்குப் பிறகு அம்மணியை தமிழ்த்திரையில் காணவில்லை.

         மற்ற இயக்குனர்களைக் காட்டிலும் நாயகிக்கு முக்கியத்துவம் கொடுப்பது ஷங்கரின் வழக்கம்.மற்றப் படங்களில் இருப்பதைக் காட்டிலும் தம் படத்தில்  நாயகிகளின் உடை, நடை, பாவனைகளில் வித்தியாசம் காட்ட வைப்பவர்.நாயகிகளை மிகவும் அழகாக படம் பிடிக்கக் கூடியவர்.ஆனாலும் இவரது படத்தில் நடித்த நாயகிகள் தொடர்ந்து ஜொலிக்காததன் பின்னணி  என்னவென்றே தெரியவில்லை.